Titikangan na han Commission on Elections (COMELEC) yana nga Disyembre an public bidding para ha mga bag-o nga makina nga gagamiton ha 2028 National and Local Elections.
Sumala kan COMELEC Chairman George Erwin Garcia, target nira nga ma-award an kontrata ha mapipili nga supplier ha urhi nga bahin han Enero o syahan nga bahin han Pebrero ha masunod nga tuig agud magkamay-ada igo nga panahon para ha procurement, pangandaman, ngan pagprobar ha bag-o nga election system ugsa an eleksyon.
Kasunod ini han pag-apruba han COMELEC En Banc ha bag-o nga Terms of Reference o TOR para ha Full Automation System with Transparency Audit/Count (FASTRAC v2.0), nga ginbabana-bana maabot ha P22 bilyon.
Ginpahayag ni Garcia nga lakip ha mga pagbabag-o ha sistema an posibilidad nga paggamit hin stamp imbes nga ballpen ha pagmamarka han balota. Panuyo hini nga mapadagmit an proseso han pagbotos ngan malikayan an mga problema may koneksyon ha pagsarang o pagdikit han tinta ha mga balota.








