Nagpaplano an Pilipinas hin pagtukod hin usa nga panrehiyonal nga mekanismo para ha pag-titirok hin pagkaon ngan humay kumo pangandaman ha tarhog han magkadurudilain nga krisis ha Southeast Asia, kaupod na an posibilidad han makusog ngan maiha nga El Niño.
Presente nga nagkasarabot an Association of Southeast Asian Nations (ASEAN) nga parig-unon an kooperasyon ha sektor han agrikultura, kaupod na an pagbabalyuay hin aram ngan teknolohiya nga ginagamit ha pag-uma.
Bisan man waray pa pormal nga napaghisgotan an panukala nga pag-tirok han pagkaon, ginsigurado ni Trade Secretary Cristina Roque nga maniningkamot hiya nga maiduso ini nga plano ha iba pa nga mga nasud nga miyembro han ASEAN.
Ginpabug-atan gihapon han sekretarya nga makakabulig an naeksister nga mga kasarabutan ha butnga han mga nasud nga miyembro han ASEAN agud maparig-on an suplay han pagkaon ha rehiyon ngan malikyan an tigda nga pagsaka han presyo han mga importante nga produkto.
Samtang, sumala ha usa nga pag-aram, kaupod an sur nga bahin han Pilipinas, Brunei ngan Singapore ha mga lugar nga naatubang ha peligro han makusog nga pag-uran. Kaupod gihapon ha mga lugar nga posible maapektuhan an pipira nga parte han Thailand, Cambodia ngan Vietnam.
