Pagbalik ha 6% nga pag-ursa han ekonomiya han Pilipinas, dire madali—Moody’s

Posible nga makurian an ekonomiya han Pilipinas nga maibalik an unom ka-porsyento nga pag-ursa nga nahipatik ugsa an pandemya.

Subay ha Moody’s Ratings, ada ha 5.5% la an posible magin sustainable growth rate han nasud ha halipot nga panahon kun dire mapapaupay an pamumuhunan ngan pagtapod han mga negosyante.

Ginmalatumat ni Moody’s Assistant Vice President for Sovereign Risk Young Kim nga bisan mayda suporta an ekonomiya tikang ha dako nga populasyon nga ada ha produktibo nga edad ngan madig-on nga pag-eexport han mga serbisyo, kinahanglan la gihapon makabawi an pamumuhunan agud mapalaksi an pag-ursa.

Ginbabana-bana naman han Moody’s nga maabot la ha 3.3% an pag-ursa han gross domestic product o GDP han Pilipinas ha 2026, ugsa sumaka ha 5.1% ha 2027. Ginlalauman nga makakabulig dinhi an hinay-hinay nga pagbawi han pampubliko nga pamumuhunan ngan pagpahaluag han mga pan-gawas nga ayat ha ekonimiya.

Gintagan-duon ni Kim nga importante nga maibalik an kumpyansa han mga investors ngan mapakusog an pamumuhunan han gobyerno ngan pribado nga sektor. Kaupod ha mga posible magparibhong ha ekonomiya an mga proyekto nga pan-impratraktura, public-private partnerships, renewable energy, digital infrastructure, logistics, ngan manufacturing.

Nagpahimatngon gihapon ini nga kun mas made-delatar an mga proyekto han gobyerno, posible nga bag-uhon han Moody’s an 5.1% nga growth forecast hini para ha 2027.

Posible gihapon nga makaapekto ha ekonomiya an pabag-o bag-o nga presyo han enerhiya ngan an ginlalauman nga El Niño nga posible magpa-ubos ha produksyon han agrikultura ngan paghitaas ha presyo han mga papliton.