Dire daw makakaapekto an pagigin anay hepe han Philippine National Police ni Senador Ronald “Bato” Dela Rosa ha paningkamot han mga otoridad nga igpatuman an arrest warrant kontra ha iya.
Ini an ginsigurado han Philippine National Police ha butnga han padayon nga pamiling ha senador, nga naatubang ha warrant of arrest nga iginpagawas han International Criminal Court (ICC) kasumpay han kaso nga crimes against humanity nga nag-ugat ha war on drugs han administrasyon ni anay presidente Rodrigo Duterte.
Sumala kan PNP Spokesperson PCol. Allen Rae Co, dire magbabag-o an trabaho han mga pulis mahitungod la ha anay posisyon han tawo nga ira ginpapamiling.
Gintagan-duon gihapon ni Co nga dire personal nga desisyon o konsiderasyon nga pampulitika an magigin basaranan han ira operasyon.
Manunumduman nga gin-ayat han Malakanyang an liderato han Department of the Interior and Local Government (DILG) ngan PNP nga siguraduhon nga dire magigin balaong ha pag-aresto kan Dela Rosa an anay posisyon hini kumo hepe han nasyunal nga pulisya.
Padayon naman an pagkarawat ngan pagberipika han PNP ha mga impormasyon may paghisumpay ha kinamumutangan ni Dela Rosa pinaagi han mga hotlines hini.
Nagpapabilin gihapon an mga tracker nga nakatudlok ha bug-os nga nasud agud matudlok an kinumumutangan han senador ngan maipatuman an warrant of arrest kontra ha iya.
_2026_11_05_12_05_14.jpg "Jessica Sanchez, iginpaangbit an iya Boracay gateway kaupod an iya anak")
