Ginduduso ni Parañaque 2nd District Rep. Brian Yamsuan an temprano nga pagsumite hin panukala nga balaud nga maghahatag hin sistema ha pangongolekta, pagre-recycle ngan eksakto nga paglabog han mga ruba nga electronic device agud malikayan an kadelikaduhan ha panlawas ngan kalibungan.
Ha ilarum han House Bill 11462 o National E-Waste Management Act, panuyo nga magpatuman hin klaro nga balaud ha paglabog hin mga electronic waste o e-waste pareho han cellphone, computer, appliances, powerbank, USB cable ngan iba pa nga electronic gadgets.
Sumala kan Yamsuan, posile makontamina han mga delikado nga kemikal pareho han lead, mercury, ngan cadmium an hangin, tuna ngan tubig kun diri maayos an paglabog han mga kagamitan. Dugang pa niya, kinahanglan magkamay-ada hin komprehensibo nga sistema ugsa pa magtikagrabe an problema kasunod han madagmit nga pagbalyo han mga electronic device.
Ha nasabi nga panukala, pangungunahan han Department of Environment and Natural Resources (DENR) an pagpapatuman han mga balaud ha pagbulag, pangolekta, pagdara, pagrecycle ngan paglabog han e-waste.
