Nagpahimatngon an Food and Drug Administration o FDA ha publiko kontra ha pagpalit ngan paggamit han mga dire otorisado nga squishy toys nga posible magdurot hin kadelikaduhan ha panlawas ngan katalwasan han mga kabataan.
Ha magkabulag nga advisory dida han Setyembre, gin abisuhan han FDA an publiko nga dire pumalit ngan gumamit han duha nga produkto ngan gin ngaranan hin “Squishy Delicious Blue” ngan “Squishy Delicious Green.”
Subay ha ahensya, waray umagi an mga ini ha sakto nga proseso han notipikasyon sanglit dire masigurado an kalidad ngan katalwasan han mga produkto.
Nagpahimatngon gihapon an United States Consumer Product Safety Commission nga mayda pira nga squishy toys nga nagsusulod hin water beads, gel, liquid, pulbos, o baras. Kun magisi o bumuto an gawas nga takop hini in posible nga ma-expose an mga bata ha sulod hini nga posible magdurot hin pagkabut-uki, pagbabara an bituka, ngan iba pa nga kadelikaduhan kun matulon o maisulod ha irong ngan talinga.
Samtang, gin kumpiska han Malaysia an sobra lima ka-yukot nga squishy toys mahitungod nga waray ini Safety Compliance Mark. Gindayaw naman han grupo nga BAN Toxics an FDA ngan Department of Environment and Natural Resources ha ira pitad kontra ha mga mulayan nga posible mayda delikado nga kemikal, kaupod an pagbabawal ha paggamit hin benzene ha mga mulayan ngan iba pa nga produkto nga pambata.
Gintagan-duon han BAN Toxics nga kinahanglan sumunod an ngatanan han mulayan ha mga standards ha katalwasan ngan pagbubutang hin label ha ilarom han Republic Act 10602 o Toy and Game Safety Labeling Act.
