Magsasalawad hin kaso nga kriminal an South Korea kontra ha mga istudyante nga madadakop nga nagamit hin smart glasses ha panlimbong ha national exam para ha pagsulod ha mga unibersidad.
Plano na gihapon han gobyerno nga pahugtan an sirot ha mga sugad nga pagtalapas.
Subay ha usa nga opisyal han Education Ministry, an mga istudyante nga madadakop nga nanlilibong gamit an smart glasses in posible maatubang ha kaso nga kriminal.
An mga nasabi nga salamin in mayda kapas nga kumuha hin litrato ngan video, ngan makipagsumpayan ha artificial intelligence o AI assistant.
Mahugot an kompetisyon ha South Korea nga gintatawag nga “Suneung,” an national exam nga importante nga basaranan ha pagsulod ha mga nangunguna nga unibersidad. Iginkokonsidera gihapon ini nga dalan tikadto ha mas maupay nga oportunidad ha trabaho ngan kinabuhi.
Ha ilarom han plano nga bag-o nga sirot, dire na pwede kumuha utro hin exam ha sulod han tulo katuig an mga istudyante nga madadakop nga nanlilimbong gamit an smart glasses. Mas hamubo ini kumpara ha presente nga usa katuig nga pagbabawal.
