Trump, gin pahayag nga harani na matuman an pagkikita nira Putin ngan Zelenksy

Iginpahayag ni US President Donald Trump dida han Myerkules nga harani na matuman an pagkikita nira Russian President Vladimir Putin ngan Ukrainian President Volodymyr Zelensky.

Sumala kan Trump, ginlalauman nga magkakamay-ada hin dako nga pag-abante ha istoryahon han pankahimyangan ha oras nga madayon an ira pagharampang.

Kadungan ini han pagpapakusog han administrasyon ni Trump ha mga diplomatiko nga pitad agud undangan an kasamok ha butnga han Russia ngan Ukraine nga yana in ada na ha ikalima katuig.

Ginmalatumat naman ni Zelenksy dida han Dominggo nga ginlalauman nga magkakamay-ada hin tulo kaparte an pagharampang ha butnga han Ukraine, United States, ngan Russia ha maabot nga Nobyembre agud utro nga buhion an mga istoryahon nga pan-kahimyangan nga maiha na nga naundang.

Nauna na nga gin kumpirma han Kremlin nga plano pagdumaraon an nasabi nga pagharampang ha United Arab Emirates.

Sugadman, nagpapabilin nga balaong ha istoryahon nga pankahimyangan an pagbaribad ni Putin nga makig-atubang hin personal kan Zelensky. Hi Putin an nagmando han pag-atake han Russia ha Ukraine dida han Pebrero 2022 ngan padayon nga iginduduon han Moscow an panuyo nga makuha an nasasalin nga parte han sinirangan han Ukraine.

Samtang, han lumingkod ha pwesto dida han Enero 2025, nagpatapod hi Trump nga mahuhuman niya an kasamok ha sulod la han 24 oras. Pero ha kaluyo han sobra usa katuig nga negosasyon nga ginpangunahan han United States, waray la gihapon dako nga pag-abante ha pagkakamay-ada hin kasabutan, samtang pira ka-yukot nga tawo na an namatay ha kasamok.

Ha mga nakalabay nga adlaw, utro nga iginpukos ni Trump an iya atensyon kan Putin ngan ha Russia. Iginpahayag niya nga mayda ginkasabutan nga pagbabaligya han Russia hin diesel agud makabulig nga mapaubos an presyo hini, nga subay ha iya in humitaas mahitungod ha kasamok ha United States kontra ha Iran.

Ha kaluyo han mga panibag-o nga paningkamot, nagpapabilin nga dire sigurado kun san-o magkakamay-ada hin konkreto nga kasabutan agud maundang an kasamok ha butnga han Russia ngan Ukraine.