Iginsalawad ni Senate Committee on Finance Chairman JV Ejercito an duha nga panukala nga balaod nga panuyo pakusgon an transparency ngan accountability ngan matagan an publiko hin mas dako nga papel ha paggastos han gobyerno ha nasyunal nga pondo.
An mga ini in an an Bantay Budget Act ngan Senate Bill 2577 o an Grassroots Participatory Budgeting Act.
Panuyo han Bantay Budget Act nga ma-institutionalize ngan makagtukod hin mekanismo para ha partisipasyon han mga civil society organization ha pangandaman ngan pag-otorisa han tinuig nga national budget.
Samtang, an Grassroots Participatory Budgeting Act naman in panuyo nga mahimo nga balaod an bottom-up approach para ha development planning ngan budgeting ngan agud masigurado nga an mga natudlok nga panginahanglan han mga kumunidad ngan mga prayoridad nga proyekto in kaupod na ha local ngan national government spending plans.
Sumala kan Ejercito, karuyag han Senado nga magkamay-ada hin mapinulsanon nga papel han mga CSOs ha panginano ha budget han mga ahensya han gobyerno, ha mga pamakiana nga kinahanglan batunon han mga opisyal ngan kun ano nga mga prayoridad an kinahanglan himuon han gobyerno.
Dugang pa han senador, kinahanglan an kontribusyon han mga civil society organization ha pagbug-os han nasyunal nga pondo mahitungod nga hira an direkta nga nakikipagsumpayan ha mga kumunidad ngan an ira eksperyensya in makakabulig ha mga magbabalaod agud mahibaruan kun an alokasyon in tinuod nga makakabaton ha aktwal nga panginahanglan han mga residente.
