BORONGAN CITY, EASTERN SAMAR — Presente nga aada ha ika-unom ha pwesto an Borongan City ha mga syudad ha Eastern Visayas nga may pinakamahitaas nga total assets, nga sobra P4 billion an kabug-osan nga kantidad.
Sumala kan Borongan City Mayor Jose Ivan Dayan Agda, mas importante para ha iya an paghibaro kon malipayon ba an mga Boronganon ngan kon naabat ba nira ha ira adlaw-adlaw nga panginabuhi nga may gobyerno nga nanginginano ha ira kaupayan ngan nahahatag ha ira an mga batakan nga panginahanglan.
Dugang han alkalde, prayoridad han lokal nga gobyerno nga masigurado nga nabubuligan an mga residente pinaagi han paghatag han ira mga panginahanglan, labi na ha butnga han mga kakurian nga naieksperyensyahan ha pagkayana.
Lakip hini an padayon nga pagsaka han presyo han lana, nga may epekto ha panginabuhi han mga pamilya. Tungod hini, ginpahayag ni Agda nga naghimo an City Government han Borongan hin mga pitad agud maibanan an posible nga epekto han krisis ha mga Boronganon.
Ha kataposan, nagpasalamat hi Agda ha mga Boronganon tungod han ira suporta ngan nag-aghat ha ira nga magpadayon ha pag-ampo agud mapanalipdan an syudad tikang ha mga tiarabot nga kalamidad. Gin-aghat liwat niya an publiko nga padayon nga tumapof ha lokal nga gobyerno, makigbinuligay para ha kalampusan han syudad, ngan magin mabinantayon ha pag-ataman han kalibungan.
