Nanawagan an Makabayan bloc ha House of Representatives nga bawion ngan rebisahon an bersyon hini han panukala nga 2027 National budget, mahitungod nga nagpapabilin dinhi an mga mekanismo nga kaparehas han mga probisyon nga igindeklara nga unconstitutional han Supreme Court ha mga nakalabay nga budget law.
Kaupod daw ha mga kwestyunable nga alokasyon an P50 bilyon nga AFP modernization fund, dagko nga lump sump funds para ha mga lokal nga gobyerno, ngan pagbalhin han pondo ha unprogrammed appropriations.
Sobra 6,000 gihapon nga bag-o nga Public Works projects an naidugang pinaagi han gintatawag nga institutional amendments, hin dire iginlalatag hin pausa-usa an mga proyekto.
Nagpahimatngon naman hi Kabataan Rep. Renee Co nga nagpapabilin an kadelikaduhan han korapsyon ha magkadiru-dilain nga infrastructure projects, kaupod an multipurpose buildings, farm-to-market roads, ngan mga klasrum.
Gin hangyo gihapon ni Gabriela Partylist an imbestigasyon ha national farm-to-market roads network plan mahitungod ha mga alegasyon han ghost projects ngan overpricing.
Nanawagan gihapon an Makalabayan ha Ombudsman ngan Commission on Audit nga imbestigahan an mga opisyal nga posible magbaton ha mga probisyon nga pagtalapas ha konstitusyon.
Samtang, gin panhimuwa naman han Palasyon an interpretasyon han Makabayan bloc nga posible magbaton an Presidente, ngan ginmalatumat nga dire ini nakasurat ha desisyon han SC. Kun dire babawion han Kamara an panukala, gin aghat ni Deputy Minority Leader ngan ACT Party-list Representative Antonio Tinio an Senado o bicameral conference committee nga ig-sakto an mga kwestyunable nga probisyon.
