Ginpapakusog han Department of Education ngan Department of the Interior and Local Government an seguridad ha mga eskuylahan ha pamamaagi han pag-deploy han mga barangay tanod ngan pagpapahaluwag han 911 emergency system ha mga eskuylahan.
Kaupod ini han joint memorandum circular nga ginpirmahan han duha nga ahensya dida han Oktubre 14, ha pangunguna nira Education Sec. Sonny Angara ngan Interior Sec. Jonvic Remulla, kadungan an pagdudumara hin school safety audit ngan emergency drill ha Bangkal High School ha Makati City.
Ha ilarum han kasarabutan, mahugot nga makikipagsumpayan an mga eskuylahan ha ira mga barangay agud umaro hin bulig ha mga tanod ha pagpapabilin han kaupayan ngan seguridad ha sakob ngan gawas han eskuylahan.
Ginklaro naman han DepEd nga dire babalyuan han mga barangay tanod an mga otoridad han eskuylahan o an mga alagad han balaud. Panuyuan han pitad nga pakusgon an mga mekanismo ha pagbaton ha mga insidente han karahasan, panmusil ngan iba pa nga tarhog ha seguridad han mga estudyante.
