Patay an usa nga 39-anyos nga lalaki mahuman buno-on gamit hin kutsilyo han 36-anyos nga lalaki ha Barangay Balorinay, Burauen, Leyte.
Sumala kan PLtCol. Allan Camasin, Officer-in-Charge han Burauen Municipal Police Station, nahitabo an insidente pasado alas-9:45 han gab-i dida han Oktubre 8, kun diin upat katawo an nag-iinom. Subay ha asoy han testigo, nagkabigit an biktima ngan an tatay han suspek mahitungod la ha barangay election. Dugang pa han testigo nga waray iba nga ginkadelituhan an biktima ngan an tatay han suspek mahitungod magsangkay ngan mag-amyaw ini hira.
Samtang, an suspetsado in nakadto la han hirani nga balay ngan pakasabot niya nga may kaaway an iya tatay, dayon ini kumadto ha lugar ngan ginbuno makausa an biktima ha tagiliran nga hinungdan ha kamatay hini.
Basar ha impormasyon, an biktima in may live-in partner, may pito nga anak ngan residente han Barangay Balorinay, Burauen, Leyte, samtang an suspek, paragsanggot ngan residente han pareho nga barangay.
Waray naman marekober an kutsilyo nga gin-gamit ha panbuno, nga ginbabanabana nga may kahilaba nga 12 ka pulgada. Samtang, dayon nga gin-aresto han mga otoridad an suspek ngan ginpasakahan na hin kaso nga murder.
