Nasunog an usa nga truck nga kargado hin construction supplies samtang naka-standby ha atubangan han bodega nga ginlulusaran han mga kargamento ha parte han national highway ha Capoocan, Leyte.
Sumala kan FO2 Jimlary Mahayag, duty investigator han Capoocan Municipal Fire Station, tikang pa ha Palompon, Leyte an truck nga ginmamanehuan ni Roberto, 38 anyos, residente han Villaba, Leyte.
Dugang pa ni Mahayag, diri na nabiyahe an nasabi nga truck han mahitabo an sunog kun diin nag-aandam an driver ngan pahinante hini ha pagdiskarga han mga kargamento. Sumala ha driver, may tumawag ha ira nga nag-aaso na an ira truck, ngan han pag-abri hini ha purtahan han truck, tigda nga dumako an kalayo.
Nagtikang an sunog ha dashboard nga hirani ha parte han driver, pero padayon pa an imbestigasyon han Bureau of Fire Protection (BFP) agud matudlok an eksakto nga gintikangan han sunog. Ginklaro liwat ni Mahayag nga waray kagamitan nga nakabutang ha sulod han truck nga hinungdan han sunog. Gin-aalegar nga maabot ha P90,000 an kantidad han kadaot, pero kukumpirmahon pa ini kahuman makuha an deklarasyon han tag-iya han truck.
Waray naman nasamaran nga indibidwal ha insidente ngan waray liwat maapektaran an mga kargamento nga nakatalaan i-deliver. Nagpahimatngom hi Mahayag ha mga drayber nga siguraduhon nga pirmi aada ha maupay nga kondisyon an mga sarakyan nga gagamiton agud malikyan an pareho nga insidente.
