Gin-abandona an armado nga pakikipag-bisog ngan sumurender ha tropa han gobyerno an upat nga miyembro han Communist NPA Terrorist o CNTs mahuman an waray wantas nga paghinangyo han ira mga pamilya.
Ginkilala an upat nga surrenderees, kanda alyas Jun-Jun, Yana, Tanggol ngan Digma nga mga miyembro han Sub-Regional Committee ARCTIC ha ilarum han Eastern Visayas Regional Party Committee o EVRPC.
Nagsurender an mga ini durante han joint military operations nga gindumara ha Borongan City, Eastern Samar ngan ha mga munisipalidad han Palapag ngan Catubig ha Northern Samar.
Sumala ha mga surrenderees nga makuri an ira kabutangan ngan waray nira kamurayawan sanglit nagdesisyon na an mga ini nga sumurender ngan bumalik ha ira mga higugmaon ha kinabuhi ngan ha gobyerno, ha bulig na gihapon han waray wantas nga paghinangyuon han ira mga pamilya nga umundang na an mga ini
Sumala naman ha 8th Infantry Division, Philippine Army nga an sagunson nga malinangpuson nga pagsurender han mga CTN in nagpapakita han nagtitikaluya nga presensiya han Communist Terrorist Groups ha Sinirangan Bisayas. Sugadman an nagtitikadamo nga realisasyon han mga miyembro han CTGs nga ig-abandona na an armado nga pakikipagbisog mahitungod nga waray ini mahingangadtuan.
Samtang, nanawagan naman an tropa han gobyerno ha iba pa nga miyembro han CTGs nga sumurender na agud makabalik na hira ha ira mga pamilya ngan mabuhi hin mahimyang ngan waray tarhog ha kinabuhi.
