Usa nga 95-anyos nga lolo ha New Zealand an padayon nga nakikigbisog ha mga balud ngan nagpapamatuod nga dire balaong an edad agud magin aktibo an lawas.
Pormal nga ginkilala ni Bryan Murray han Guinness World Records kumo pinakalagas nga lalaki nga waterskiers ha bug-os nga kalibutan dida han Abril ha edad nga 95 mahuman hiya mag-waterski ha Lake Kereta ha Auckland.
Yana, padayon la gihapon hiya nga nage-enjoy ha iya paborito nga libangan kada-summer.
Tuig-1995 pa han magtikang nga mag-waterski ni Bryan, nga yana in mayda na duha nga anak, unom nga apo, ngan napulo nga apo ha tuhod. Nagtikang ini han buttangan hin makina han ira sangkay an ira bangka, samtang an usa pa nira nga sangkay nga nagsesebi ha New Zealand Air Force in nag-uli hin waterski tikang ha Singapore. Mahitungod ha kyuryusidad, nagdesisyon hira nga prubaran ini.
Waray pag-iha, nagin paborito na ini nga bonding han ira pamilya ngan bumulig gihapon hi Bryan ha magkadiru-dilain nga kompetisyon ha iba-iba nga parte han New Zealand tikang hadton dekada ’60. Agsub ini magdaog ha mga age group tournament ha kategorya an slalom tricks ngan jump.
Iginpaangbit ni Bryan nga agsub hiya tawagon han iba nga tawo kumo usa nga inspirasyon para ha ngatanan han henerasyon. Para ha iya, makalilipay nga mahibaruan nga nagigin ehemplo hiya ha agud magpabilin nga aktibo an iba.
Ha pagkayana, malipayon hi Bryan ha pag-waterski kada-summer, samtang padayon hiya nga nage-ehersisyo ha gym kada-winter agud mapabilin an ira kusog ngan panlawas ha iya paborito nga sports.
