Siyam nga katawo an narescue mahuman tumigilid an ira ginsakyan nga motor banca tungod han dagko nga balud ngan makusog nga hangin samtang nagbibiyahe tikang ha Limasawa Island ngadto ha Padre Burgos, Southern Leyte.
Sumala kan LTJG Walter D. Leal PCG, Station Commander han Coast Guard Station Southern Leyte, nahitabo an insidente pasado alas-9:30 han aga samtang ginsulsog han motor banca an dagko nga balud ngan makusog nga hangin nga resulta han habagat. An nasabi nga motor banca in diri rehistrado ngan waray liwat clearance tikang ha Philippine Coast Guard para magkarga hin mga pasahero.
Alas-10 han aga han nakakarawat hin report an mga awtoridad tikang ha mga personnel han Bureau of Fire Protection (BFP), kun diin tikang an impormasyon ha usa nga paryente han usa nga pasahero. Dayon nga nagdeploy hin mga tauhan an Coast Guard Station Southern Leyte ngan an Coast Guard Substation Padre Burgos agud kadtoon an lugar kun hain an motor banca.
Siyam an ngatanan nga sakay han motor banca, duha nga crew ngan pito nga pasahero. Upat han mga pasahero in kababayin-an, ngan may mga tikang ha Southern Leyte, Manila ngan Bohol. Waray may nasamaran o namatay ha insidente, ngan ngatanan nga sakay in nasagip ngan gindara ha MDRRMO Padre Burgos.
Gintagan hin angay nga assistance an mga natalwas samtang nagpapadayon an pagdokumento han Coast Guard han insidente. Ginpahayag ni Leal nga an pagsakay hin mga pasahero ha motor banca nga diri rehistrado ngan waray clearance tikang ha Coast Guard in usa nga pagtalapas han mga patakaran ha maritime safety.
May-ada na nakatalaan nga hearing para han driver han motor banca para bumaton ha mga pagtalapas nga ginsalawad han Coast Guard Station Southern Leyte kontra ha iya. Padayon naman an panawagan han Coast Guard ha mga operator ngan pasahero nga sundon an mga kinahanglanon ha pagbiyahe ha dagat, labi na ha panahon nga makusog an balud ngan hangin.
