TACLOBAN CITY – Malinampuson nga gindumara han buhatan hiton Bureau of Fisheries and Aquatic Resources Region VIII an 61st Fish Conservation nga mayda tema, nga “Sama-sama Tungo sa Maunlad at Likas-kayang Pangisdaan sa Bagong Pilipinas.”
Sumala kan Bureau of Fisheries and Aquatic Resouces VIII, Information Officer, Christine Gresola nga usa ha mga highlight han mao nga serebrasyon yana nga tuig in agud ipasamwak an mga impormasyon ha sakto nga pag-atiman ngan konserbasyon han katubigan ha mga kabataan.
Gintikangan an mao nga serebrasyon dida han Lunes, Setyembre 16, kun diin, nagpartisipar an mga kabataan nga estudyante ha magkadurudilain nga aktibidades ngan paisan-isan nga gindumara ha usa nga mall ha siyudad han Tacloban; Sugad hiton spoken poetry ngan poster-making hiunong hiton problema ha polusyon ha kadagatan sugadman an pag-konserba hini.
Yana nga adlaw Setyembre 20, pagbubuhaton naman han BFAR VIII an awarding ceremony para ha mga nagdaog ha mao nga aktibidad.
An panuyuan han Fish Conversation Week in agud igduso ngan igpasamwak ha molupyo an sakto nga pag-atiman, konserbasyon, ngan pagproteher ha aton kadagatan sugad man an mga grasya nga ginhahatag hini agud mapabilin an sustenable nga industriya han pangingisda ha Pilipinas.
