TACLOBAN CITY – Waray na kabarak-an nga mawawara an programa nga Pantawid Pamilyang Pilipino Program o kon 4Ps kahuman han termino ni Presidente Duterte tungod nga balaud na ini.
Pinaagi han Republic Act (RA) 11310, nga ginpirmahan ni Duterte dida han Abril 17, ma-iinstutionalized na ini nga programa para ha mga kablasanon nga Pilipino.
An Pantawid Pamilyang Pilipino Program (4Ps) or Republic Act (RA) 11310 in namugna para maghatag hin financial assistance ha mga kablasanon nga pamilya nga gagamiton para ha edukasyon ngan mas mapaupay pa an ira kinabuhi ngan panlawas.
Ha ilarom han balaud, tatagan an benepisaryo hin maximum period nga 7 katuig kumo myembro.
Depende ha “exceptional circumstances” magdedesisyon an National Advisory Council kon mas papahalawigon pa an pagiging myembro han usa nga benepisaryo.
Kinahanglan liwat nga tumanon han usa nga myembro an mga kondisyon nga ginlatag han programa.
San-o liwat magin benepisaryo igka-classify anay hira han DWSD kumo mga pobre.
Ikaduha, kinahanglan mayda myembro han ira pamilya nga bag-o nga anak kutob 18 anyos han panahon nga ginrehistro hira.
Ngan ha katapusan, kinahanglan nga willing hira mag- comply ha kondisyon nga ginlalarang han balaud.
Kaupod ha mga kwalipikado hini nga programa adton mga pamilya han parag-uma, purupangisda, myembro han indigenous sector, waray mga panimalay ngan adton mga nangungukoy ha mga tay-aw nga lugar nga waray pa linya hin kuryente.
Ginre-review naman han Department of Social Welfare and Development (DSWD) an status han ira kwalipikado nga benepisaryo pinaagi han targeting system nga ginbubuhat kada 3 katuig.
Mababaruan nga sobra 280,000 an myembro han 4Ps ha Sinirangan Bisayas dida han 2018.
