TACLOBAN CITY – Ginpahayag han Police Regional Office 8 nga aada ha 45 nga mga retailers ngan upat nga dealers hin firecrackers ngan iba pa nga mga pyrotechnic devices an ira gintagan hin permit nga magabligya yana nga holiday season.
Gin aprubahan han Philippine National Police (PNP) ipinaagi han Regional Civil Security Unit (RSCU) an special permits han 10 nga mga retailers ha Eastern Samar, siyam ha Leyte ngan Samar, unom ha Biliran, lima liwat an gintugutan ha Northern Samar pati na ha Southern Leyte, usa ha syudad han Tacloban kaupod na an upat nga mga authorized dealers.
Sumala kan Master Sgt. Joessie Delantar, clerk chief executive han Regional Civil Security Unit (RSCU) mas hibubo an kumuha hin special permit nga mga retailers ngan yana nga tuig kon igkukumpara han nakalabay nga tuig diin 56 an retailers ngan 6 liwat an dealers.
Gintagan hin duon ni Delantar nga nagdudumara hira hin regular nga inspeksyon ha mga establishmento kasumpay na gihapon ha mas ginpakusog nga kampanya han mga kapulisan ha illegal nga paghimo ngan pagbaligya hin mga pabuto.
Pira ha mga igindidiri nga mga pabuto amo an piccolo, watusi, giant whistle bomb, giant bawang, dako nga Judas belt, super lolo, lolo thunder, boga, ngan goodbye Philippines.
An hin o man nga maaaktuhan nga naghihimo, nagbabaligya, nagdidistribwer ngan nagamit han ilegal nga mga pabuto in pwede nga umatubang ha multa nga PHP20,000 kutob PHP30,000 o kapresuhan hin unom kabulan kutob usa katuig.
Pwede gihapon nga igkansela an lisensiya ngan business permit han nagtitinda kaupod na an pagkumpiskar hini nga mga pabuto ngan pyrotechnic devices.
Mababaruan nga tikang han Disyembre. 21 kutob Enero 6, han nakalabay nga tuig nakaghipatik iton Sinirangan Bisayas hin 15 nga mga firecracker-related injuries tungod ha paggamit han boga, kwitis, five star, whistle bomb, recycled firecracker powder, binggala ngan piccolo.
