TACLOBAN CITY– Ginpahibaro hiton Bureau of Fisheries and Aquatic Resources BFAR-8, nga naka-karawat hira hin report nga maabot ha 26 nga indibidwal an na admit ha Samar Provincial Ospital, mahuman nga maka-kaon hin tahong ngan oyster nga sakop han kadagatan hiton Daram Samar.
Sumala kan Bureau of Fisheries and Aquatic Resources Regional Office 8 Information Officer, Christine Gresola, una hine, naghatag hira hin pahimatngon ha publiko, kasumpay ha mga kadagatan nga positibo ha Paralytic Shellfish Poisoning an mga shellfish meat samples nga ginkolekta ha masunod nga mga lugar:
- DARAM ISLAND, Samar
- ZUMARRAGA ISLAND, Samar
- CAMBATUTAY BAY, Tarangnan, Samar
- MATARINAO BAY (General MacArthur, Quinapondan, Hernani, ngan Salcedo)
- IRONG-IRONG BAY, Catbalogan City
- MAQUEDA BAY, Samar (Jiabong, Motiong, Paranas, San Sebastian, Calbiga, Pinabacdao, Hinabangan)
- CARIGARA BAY (Babatngon, San Miguel, Barugo, Carigara, Capoocan, Leyte)
Dugang pa ni Gresola, kun an usa nga baybayon in sulod ha red tide warning hahugot nga igindidire an panguha, pagkaon, ngan pangolekta han ngatanan nga klase hin pangti-on o Shellfish ngan Acetes Sp. o Alamang nga tikang ha nasabi nga kadagatan.
Nanawagan naman ine ha publiko, nga mamati, ngan magsunod, matungod nga nakakagdurot ine hin kadelikaduhan ha mga indibidwal nga nakunsumo tikang ha mao nga mga kabaybayunan.
Mayda naman kaka-atubangon nga kaangayan nga penalidad an hin-o man nga magtatalapas ha nasabi nga Shellfish Ban.
Samtang, nagpapabilin la gihapon LOCAL RED TIDE WARNING an mga masunod nga kadagatan:
Coastal Waters of Biliran Island, Coastal Waters of Calbayog Samar, Coastal Waters of Leyte, Leyte, Villareal Bay of Villareal, Samar
