TACLOBAN CITY – Nakatalaan nga makakarawat hin financial assistance an second batch han mga PUJ, MCH, and pedicab drivers nga mga benepisaryo han programa ha ilarom han Department of Social Welfare and Development (DSWD).
Una hini, maabot ha 1,000 nga mga drivers hin pampasaheros nga mga sarakyan ha Tacloban an nakakarawat na hin pinansyal nga ayuda tikang ha DSWD ha programa hini nga Assistance to Individuals in Crisis Situation.
Sumala kan Chona Bahin, head han CSWDO han Tacloban, maabot pa ha 1000 nga mga benepisaryo han second batch an makakarawat hin tag tres mil kapesos buwas nga adlaw, Marso 23 kun diin pagdudumaraon an payout ha Astrodome.
Kalakip ha mao nga mga benepisaryo an mga PUJ, MCH ngan pedicab drivers nga nakapagparehistro han ira mga behikulo san-o an Marso 4 yana nga tuig.
Samtang, labot la han mga drivers hin pampasaheros nga mga sarakyan, yana nga maabot nga Marso 24 in makakarawat gihapon hin tag-tres mil pesos nga ayuda an maabot 1,000 nga mga Yolanda housing beneficiaries ha lima nga mga relocation sites ha Tacloban North.
Gintagan naman han DSWD hin prayoridad an mga indigent beneficiaries nga aadto gud nag-uukoy mismo ha mao nga mga housing units.
Nahibaruan nga an Assistance to Individuals in Crisis Situation program han DSWD in nagpapanuyo nga matagaan hin bulig an mga katawhan nga pinakaapektado ngan sobra nga nakukurian tungod han ginkakaatubang nga krisis.
Eligible naman nga makakarawat han mao nga hinabang bisan an mga benepisaryo nga nakakarawat na han SAP grant han naglabay nga tuig.
