TACLOBAN CITY – Patay an duha nga parupangisda samtang duha naman an samaran mahuman mabuthan hin gin-aalegar badil o dinamita ha kadagatan nga sakop han Barangay Malayog, Tinambacan District han Calbayog City ha Samar.
Ginkilala an mga namatay nga hira Cristobal Rosalado, 50 anyos ngan Jamer Sigue, 32 anyos samtang an mga samaran naman in ginkilala nga hira Daryl Tahos, 27 anyos ngan hi Rogelio Diaz Jr., 24 anyos nga puros nag-uukoy ha Brgy. Cagmanipis, Calbayog City, Samar .
Sumala kan PLt. Aileen Velarde, Information Officer han Samar PPO, an mao upat nga parupangisda in nagdudumara hin illegal dynamite fishing o pan-badil kun diin amo an hinungdan han kamatay han duha nga parupangisda ngan samaran an duha pa.
Basi naman ha ira inisyal nga imbestigasyon, nagdagkot hin badil an usa ha mga biktima nga hi Rosalado ngan tigda nga bumuto ini ha iya kamot hinungdan ha iya kamatayon.
Dayon naman gindara an mga samaran ha ospital samtang ginpapamiling pa ha pagkayana han mga otoridad an patay nga lawas ni Rosalado mahuman nga mawara ha mao nga insidente.
