NATIONAL NEWS : Igin pahayag han Commission on Elections (Comelec) nga maabot ha 18,271 an kabug-usan nga pwesto han gobyerno an nakatalaan nga punuan ha pagdudumaraon nga National and Local Elections (NLE) ha Mayo 2025.
Subay ha COMELEC, pangunahon ha mga nasabi nga posisyon in an 12 ha pagka-senador, 254 nga membro han House of Representatives, ngan 63 nga partylist representatives.
Pupun-an gihapon an posisyon han 82 nga gobernador, 82 nga bise gobernador, ngan 792 nga provincial board members.
Sugadman an 149 nga city mayors, 149 nga city vice mayors, 1,582 nga city councilors, 1,493 nga town mayors, 1,493 nga town vice mayors, ngan 11,948 nga town councilors.
Kaupod gihapon ha mga pupun-an in an parliyamento han Bangsamoro Autonomous Region in Muslim Mindanao (BARMM), ngan 40 nga BARMM party list representatives.
An filing han Certificate of Candidacy (COC) in gintalaan na han COMELEC ha maabot ha Oktubre 1 kutob Oktubre 8 han presente nga tuig.
Nagpapadayon pa gihapon an voter’s registration period kun diin nakatalaan ine mahuman yana nga Setyembre 30, 2024.
