TACLOBAN CITY – Umapela hin bulig an maabot ha 14,700 nga mga indibidwal ha Lope de Vega Northern Samar nga naapektaran han duro nga pagbaha ngan landslides durot han paglasurbo han Bagyong Usman.
Sumala kan Lope de Vega Mayor Ana Tan Palloc, ha pagkayana in nakapailarom la gihapon ha state of calamity an ira lugar, waray la gihapon suplay hin kuryente ngan sugad man impassable la gihapon an mga karsada partikular na an mga naapektaran hin landslide.
Dugang pa hini, nga ha pagkayana in nagpapabilin la gihapon ha evacuation center an pira nga mga pamilya mahuman nga ma-washout an ira mga panimalay mahitungod ha pagbaha ngan landslides nga nahipatik ha ira lugar.
Ha kaluyo han nakarawat nga mga bulig tikang ha DSWD ngan pira nga mga indibidwal in nanginginahanglan la gihapon hin bulig an mga biktima han bagyo labi na nga tubtob nala ha duha kaadlaw an suplay hin pagkaon ngan tubig.
Nahibaruan nga lima katawo an nahipatik nga patay ha Lope de Vega, 1,445 nga partially damaged nga panimalay ngan 697 naman nga totally damaged.
