TACLOBAN CITY – Nagdumara hin walk-out activity an pira nga mga istudyante han pira nga unibersidad ha syudad han Tacloban kumo pagdumdom han ika-39 nga anibersaryo han EDSA People Power Revolution, kakulop nga adlaw, Pebrero 25.
Ha gindumara nga gios-protesta, iginduon han mga istudyante an ira panawagan para ha pagbaton han administrasyon ni Presidente Ferdinand Marcos Jr., pagpapatalsik kan Bise Presidente Sara Duterte, ngan pagpapagawas ha Tacloban 5.
Sumala kan Katipunan ng Sanggunian ng Mag-aaral sa University of the Philippines (KASAMA sa UP) National Chairperson, Paul Lachica, waray kahuman an ‘diwa’ han People Power dida han 1986.
Lugod in padayon nga ‘ginsasabuhay’ han mga kabataan nga Pilipino an ira pag-ato para ha demokrasya ngan katungod.
Gintagan-duon ni Lachica nga mas kumusog an kahangit han mga kabataan mahuman nga tanggalon ni PBBM an EDSA People Power Revolution kumo usa nga opisyal nga holiday ngan gin himo ine nga Special Working Holiday.
Dugang pa hine, usa ine nga klaro nga pitad agud paraon ha kasaysayan an mahinungdanon nga kadaugan han mga molupyo kontra ha diktaturya.
Labot pa hine, maduon gihapon nga gin kondina han mga istudyante an desisyon han administrasyon han UP Tacloban nga waray suspendiha an klase ha adlaw han anibersaryo han People Power ha kaluyo han panawagan han mga istudyante.
Usa daw ine nga insulto ha mga iskolar han bayan nga padayon nga igin papakigbisog an integridad han unibersidad ngan an mahinungdanon nga papel hine ha pag-ato ha pag-ato ha diktadurya.
Usa pa naman ha mga pangunahon nga panawagan han mga istudyante an pagpapatalsik kan Bise Presidente Sara Duterte nga ira gintawag nga “korap” ngan “inutil.”
An mga isyu han korapsyon ngan kawaray hin klaro nga direksyon ha sektor han edukasyon in pira la ha ha mga rason kun kay-anu dire angay nga magpabilin pa pwesto an bise presidente.
Nagpahimatngon gihapon an mga istudyante nga kun magpapadayon an administrasyon Marcos Jr. ha mga pitad nga iginkokonsidera nira nga mapanalumpigos in mas damo pa nga kabataan an magawas ha karsada agud ig-ato an ira mga katungod ha mga masunod nga tuig. (via Bombo Shiela Encio)
