TACLOBAN CITY–Nakab-ot ni Jose Arnil Corong Jr, nga nakahuman ha Visayas State University (VSU), an Top 1 nga pwesto ha Mechanical Engineering Licensure Examination yana nga tuig 2026.
Ha pikikighimangraw han Bombo Radyo Tacloban, ginpahayag ni Corong nga ginproproseso la gihapon niya an nagin resulta hine.
Ginmalatumat nga nagtikang an iya preparasyon han kolehiyo kun diin ginsaad niya ha iya kalugaringon nga pirme ighatag an iya “100% effort”.
Umabot naman ha 6 ka bulan an iya review kun diin kalakip han iya mga preparasyon kay an pag-istudyo hin 4-6 ka oras kada adlaw, ngan an pagbuhat hin problem solving.
Kaluyo hine, ginbuyagyag ni Corong nga naka abat ine hin “self-doubt” mahitungod nga ginkumpara niya an iya kalugaringon ha iba, pero nag-pokus la ine ha iya pag-istudyo agud nga malikayan ine.
Ginpaangbit naman hine an iya mga tips ha pag-aram sugad han pag-istudyo han mga handouts tikang ha review center, an paghimo hin mga digital flash cards para han mga konsepto nga dire pa masyado nga naiintindihan, an pagbuhat hin problem-solving, ngan an kumpleto nga pagkaturog.
Samtang, duro nga ginpasalamat naman ni Corong an iya kapamilya, mga kasangkayan, iya partner, ngan ha Ginoo nga nakabulig ha pagpaupay han iya performance ha exam.
Photo Courtesy | VSU Main, Dept. of Mechanical Engineering
