HINABANGAN, SAMAR – Patay an usa nga rebelde mahuman an nahitabo nga engkwentro ha butnga han tropa han militar ha Barangay Cabalagnan, Hinabangan, Samar, kakulop nga adlaw, Pebrero 25.
Sumala kan Philippine Army 8th Infantry Division Public Affairs Officer, Cpt. Christopher Tataro, nakakarawat hin impormasyon an tropa tikang ha mga concerned citizen nga mayda presensya hin armado nga grupo ha guba nga parte han barangay, kun diin dayun naman nga nagdumara hin operasyon an militar.
Dugang pa hini, nag-iha la hin singko-minutos an balyuay han buto, kahuman in narekober nira an patay nga lawas han usa nga membro han CPP-NPA.
Narekober gihapon ha lugar han enkwentro an usa nga M16 rifle, usa nga magazine, usa nga bandolier, ngan mga subersibo nga dokumento ngan personal nga gamit han napatay nga rebelde.
Waray pa naman pangilal-an an namatay nga rebelde, mahitungod nga nagpapadayon pa an hot pursuit operation hadton mga nan-iskapo.
Nagpasalamat naman ini ha mga residente nga nagpasabot han panhitabo kun diin mahitungod hini in narespondehan gihapon ini dayun.
Samtang, dadad-on naman an patay nga lawas ha punerarya, ngan kun mayda mag-claim nga pamilya in igtu-turnover ini.
