TACLOBAN CITY – Patay an usa nga lalaki mahuman nga pagpamusilon ha Baybay City, Leyte.
Ginkilala an biktima kan Alexander Granada, 50-anyos an pangidaron, ngan residente han Zone 8, Baybay City.
Sumala kan PLt.Col. Joemen Collado, Chief of Police han Baybay City Police Station, usa nga patay nga lawas an ginreport haira buhatan kun diin droga an ginkikita nga rason han pamusil.
Ha pag-abot han mga otoridad ha lugar han panhitabo in nahikit-an nga an lawas han biktima in damo an pinusilan o igo han bala kun diin dayun naman ine nga gin proseso han SOCO nga naka-assign ha ira area.
Nakuha naman ha crime scene an usa nga black medicine box kun diin nagsusulod ine hin 37 ka-sachet hin gin aalegar nga shabu, cash money nga P9,570, usa nga cellphone ngan mga personal belongings hine.
Dugang pa han mao nga opisyal, makaduha na kabeses nga napreso iton biktima kun diin makaduha gihapon ine kabeses nga naka-avail han free bargaining.
Hapagkayana in padayon pa naman an ginbubuhat nga imbestigasyon han kapulisan.
