TACLOBAN CITY – Patay an usa nga lab-asero mahuman nga pagpamumusilon han waray pa kakilal-i nga mga suspek ha Brgy. Libertad, Ormoc City.
Ginkilala an biktima nga hi Crisanto “Antoy” Pescador, 44-anyos, may asawa ngan nag-uukoy ha Brgy. San Vicente, Ormoc City.
Sumala kan PMaj. Rizal Antonio Leung, Station Commander han Police Station 4 han Ormoc, basar ha inisyal nga imbestigasyon sakay ha iya behikulo an biktima kun diin tikang pa ini ha merkado agud kumuha han iya iglalab-as unta nga isda han tigda nala ini nga pauranan hin bala han pira nga mga suspek nga waray pa kakikilal-i.
Dead on the spot an biktima mahuman nga makag-angkon hin mga inig-an hin bala ha magkalain-lain nga parte han iya lawas.
Dayon naman nga kumalagiw an mga suspek ha lain nga direksyon mahuman la an mao nga insidente.
Narekober han mga otoridad ha crime scene an lima nga basiyo hin pusil nga gin-gamit han mga suspek ha panmumusil.
Ha pagkayana, nagdudumara na hin manhunt operation an mga otoridad agud nga madakop an mga suspek ngan padayon an imbestigasyon ha naging motibo han mga ini ha mao nga insidente.
Nahibaruan naman nga dati na nga napreso an biktima matungod ha iligal nga droga.
Nananawagan naman an mga kapulisan ha mga witness o nagpakakita ha mao nga insidente nga makipagsumpayan ngan diri mahadlok magsumat ha ira bahin ha tinuod nga natabo.
