TACLOBAN CITY — Nahulog an usa nga DLTB Bus nga pakanhi unta ha Tacloban ha usa nga kanal ha Brgy. Binanalan Sta. Rita Samar kakulop nga adlaw, Mayo 3.
Sumala kan PMaj. Rex Pabunan, Chief of Police han Sta. Rita MPS, an mao nga bus in nagtikang pa ha Manila pakanhi unta ha Tacloban ngan samtang nagbibiyahe an mao nga bus ha nasabi nga baranggay in nagprobar ini nga mag-overtake ha usa nga truck nga ginsusundan hini.
Han mag-overtake an mao nga bus in tiyempo nga mayda gihapon usa nga truck ha kaluyo nga linya kun diin nagprobrar an driver han bus nga bumalik nala ha iya linya.
Didto na nawarayan hin kontrol an driver han bus kun diin nabunggo hini an iya ginsusundan nga truck hinungdan nga mangadto ini ha usa nga kanal.
Talwas ngan waray naman may nasamaran ha maabot 45 nga sakay han mao nga bus.
Ha pagkayana in naghuhulat pa an mga kapulisan ha mga pasahero sugadman ha driver han truck nga nabunggo han mao nga bus nga magsalawad hin pormal nga reklamo agud matagan hin kaangayan nga penalidad an driver han bus.
