TACLOBAN CITY – Sumaka na ha 92% o 49,241 an ihap han ngatanan nga nagpaka-enroll nga istudyante ha mga pampubliko nga iskuylahan ha Deped Tacloban City Division tikang ha ginlalauman nga 53, 528 nga kabug-usan nga ihap han mga istudyante ha syudad han Tacloban.
Ine in basar han pinakabag-o nga datos, sumala kan Deped Tacloban City Division Information Officer, Dr. Nilo Eder
Sumala pa hine, dida han pagtikang han klase han nakalabay nga semana in nakada pala ha 84% an ihap han mga nagpaka-enroll nga istudyante, kumpara ha pagsulod han ikaduha ka-semana han klase nga 8% nala an ginhuhulat nga makagpa-enroll.
Ginlalauman naman nga yana nga semana in makokompleto na an 100% nga ihap han mga istudyante ha syudad.
Samtang, an ada pala naman ha 75% o 8,107 an ihap han mga nagpaka-enroll nga istudyante ha pribado nga iskuylahan tikang ha ginlalauman nga 10, 866 nga istudyante.
Irintidihon naman an habubo pala nga ihap han mga nagpaka-enroll nga istudyante ha pribado nga iskuylahan mahitungod nga an iba han mga ine in ha masunod pa nga semana matikang han klase ngan padayon pa an pang-enroll, samtang an iba liwat in dumungan ha pagtikang han klase ha pampubliko nga iskuylahan.
Nakatalaan naman maghuman yana nga semana an Operasyon Balik-Eskwela sanglit ginlalauman nga magpapakapa-enroll na adton mga istudyante nga dire la gihap naka-enroll hasta yana.
Pagdudumaraon naman an 1st Quarter Examination ha maabot nga Agosto 20 ngan 22, han presente nga tuig.
