TACLOBAN CITY – Gindumara na han National Historical Commission of the Philippines (NHCP) ngan han National Quincentennial Committee (NQC) an pag-unveil ha historical markers sa Guiuan, Eastern Samar na syahan nga gin-agian ni Ferdinand Magellan ha iya naging ekspedisyon han naglabay nga 500 katuig.
![](https://img.bomboradyo.com/tacloban/2021/03/1111111111111111111111111111111.jpg)
An Suluan Quincentennial Marker in gin-abrehan ha isla han Suluan ha Guiuan, kakulop nga adlaw kumo marka han 500th anniversary first circumnavigation of the world han Marso 16, 1521.
An mao nga aktibidad in kadungan gihapon han pag-ulpot han Spanish Navy training ship nga Juan Sebastian Elcano ha kadagatan han Pilipinas.
Kaupod han Elcano navy ship an barko han Philippine Navy nga BRP Apolinario Mabini ha Manicani Island ha Guiuan para ha gindumara nga fluvial parade nga gintawag nira nga “Encuentro”.
An mao nga Spanish tall ship in umatender gihapon ha usa pa nga unveiling of historical marker yana nga adlaw ha Homonhon Island san-o ini pumakadto ha Cebu ha maabot nga Marso 20.
Samtang, usa ha mga umatender ha mao nga pag-unveil han mga historical markers ha Guiuan hi Ambassador of Spain to the Philippines nga hi Jorge Moragas Sanchez, kun diin ginpahayag hini nga usa nga maupay nga oportunidad an pagselebrar han ika-500 katuig nga anibersaryo han Magellan-Elcano first circumnavigation of the world agud nga mas mapakusog pa an relasyon han Pilipinas ngan Espanya.
Sumala kan Ambassador Sanchez, an expedisyon ni Magellan in dire la usa nga trade mission kundi naghatag gihapon ini hin iwag ha mas halarom pa nga pagkasangkay han duha nga nasud.
Naglalaum an Espanya nga mas magiging marig-on pa an relasyon nira ha Pilipinas pinaagi han relihiyon, diplomasiya ngan iba pa.
Naglalaum naman an mao nga opisyal nga magsisirbe nga inspirasyon an maupay nga istorya han Pilipinas ngan Espanya agud nga mas maging halawig pa an relasyon han duha nga nasud ha masunod nga 500 pa katuig.Nahibaruan nga 34 nga mga historical markers an nakatalaan nga abrehan ha Visayas, Palawan, ngan Mindanao tikang kakulop tubtob Oktobre 28 yana nga tuig kumo kaparte han quincentennial celebrations.