INTERNATIONAL NEWS– Ginpahibaro han International Health Regulation (2005) National Focal Point han Estados Unidos ha World Health Organization (WHO) an padayon nga measles outbreak ha nasud, nga ginkukunsidira nga dire ordinaryo an panhitabo matungod nga dako an potensyal nga epekto hine ha panlawas.
Tikang han Enero 1- Marso 20, 2025 nahireport 378 nga kaso han tigdas, kalakip an duha nga namatay, ngan ine an syahan nga higayon ha sulod han 1 ka-dekada nga may naitala nga pagkakamatay matungod ha nasabi nga sakit ha Estados Unidos.
An kadam-an han mga kaso in mga kabataan an naduduktan ngan an mga ine in waray kabakunahi.
Mababaruan, nga nahireport gihapon an kapareshos nga kaso ha Mexico, samtang an Centers for Disease Control and Prevention (US CDC) ngan iba pa nga ahensya in nakikipagsumpayan na agud nga makigbinuligay nga ma-control an outbreak.
