TACLOBAN CITY – Usa nga kaso han pamusil an nahipatik ha Brgy. Tuy-a, Abuyog Leyte.
Ginkilala an biktima an Elpedio Padilla, 52-anyos an pangidaron, CAA member, ngan residente han Brgy. Tuy-a, Abuyog Leyte. Samtang gin kilala naman an suspek kan Ricardo Condes, 69-anyos an pangidaron, ugangan han biktima ngan residente han kaparehas nga barangay.
Sumala kan PSMSgt. Brexcio Fortaliza Jr., Duty Investigator hiton Abuyog Municipal Police Station, pagdepensa ha iya anak an rason kun kay-anu hine ginpusil an biktima.
Subay han gindumara nga imbestigasyon han mga kapulisan, nagkamay-ada hin diskusyon an biktima ngan han asawa hine kun diin ginsuntok ngan gin kaptan an buhok hiton biktima an iya asawa. Nahikit-an naman hiton suspek an ginbuhat han biktima ha iya anak sanglit gin pusil ine han suspek kumo pagdepensar ha iya anak nga ginkakastigo.
Nag angkon naman an biktima hin igo ha wala nga braso ngan ha wala hine nga dughan. Dayun naman ine nga nadara nga hospital ngan ha pagkayan in nagpapaupay na.
Samtang, naaresto naman an suspek ha gindumara nga hot-pursuit operation hiton mga otoridad.
Pursigido naman nga magpasaka hin kaso it biktima ha nasabi nga suspetsado.
