Gin pahitaas na ni U.S. President Donald Trump ha 15% an global duty ha mga gin aangkat nga produkto ha Estados Unidos, usa kaadlaw mahuman nga igdeklara nga ilegal han US Supreme Court an dako nga parte han iya tariff program.
Ha iya Truth Social platform, gin malatumat ni Trump nga mahuman an “thorough review” ha desisyon han Korte Suprema nga tinawag hini nga “extraordinarily anti-American,” ig iisa han administrasyon an import levies ha “fully allowed, and legally tested, 15% level.”
Nauna na gihapon nga gin anunsyo ni Trump an 10% nga taripa mahuman an desisyon han korte, Dugang pa, ha mga masunod nga bulan in magbibiling an iya administrasyon hin iba pa nga “legally permissible” nga paagi agud magpatuman hin kadugangan nga taripa.
Subay ha White House, temporaryo la an bag-o nga 15% duty ngan posible ine igpatuman kutob 150 kaadlaw.
May mga exemption la gihapon para ha pira nga sektor nga ada ha ilarom han bulag nga imbestigasyon, kaupod an pharmaceutical products ngan mga kalakal nga sakop han US-Mexico-Canada trade agreement.
An pitad an pinakabag-o nga yugto ha pabag-o bag-o nga patakaran ha taripa han administrasyon Trump, kun diin pira kasebes na nga gintudlok, ginbag-o, o ginbaiw han magkaduru-dilain nga lebel han buwis ha mga produkto nga gin aangkat ha US han nakalabay nga tuig.
