TACLOBAN CITY – Gintagaan hin kabatunan han Traffic Operations Management Enforcement and Control Office (TOMECO) an reklamo han pira nga mga MCH drivers ha syudad bahin han pagrerequire haira nga magkaada hin kalugaringon nga garahe-an han ira nga mga sarakyan.
Una hini, sumala kan Joseph Tangile, presidente han MCH Drivers Association ha Tacloban, ira ginrereklamo nga baga baga hin ginpwepwersa hira nga magkaada hin kalugaringon garahean ngan damo ha ira an nababaraka nga dire makapagrenew hin permit kun dire hira makapagcomply hini.
Samtang, sumala naman kan Ronnie Cornico, tagmangulo han TOMECO, nasusubay ha balaud an mao nga kamanduan ha mga MCH drivers nga magkaada hin garage.
Dugang pa hini nga pati gihapon an mga business establishment in ira ginrerequire nga mgakaada hin kalugaringon parkingan agud nga dire makaulang ha karsada o agianan han mga katawhan.
Ha pagkayaana in ginpapamulat pa han TOMECO an resolusyon para han towing truck nga gagamiton ala kontra ha mga natalapas ha balaud kasumpay han illegal parking.
