TACLOBAN CITY – Ginkumpirma han Department of Health (DOH) Regional Office 8 nga nagkakamay-ada hin tigda nga paghitaas han mga kaso han sakit nga diarrhea ha syudad han Catbalogan ha Samar.
Sumala kan Jelyn Lopez-Malibago, information officer han DOH Regional Office 8, nakakarawat hira hin report han hitaas nga ihap han mga kaso han diarrhea ha mao nga syudad partikular na ha Brgy. Maulong, Guindapunan ngan Canlapwas.
Dugang pa hini nga umabot ha 47 an naitala nga kaso hin diarrhea ha Catbalogan ngan padayon naman an ginbubuhat nga imbestigasyon kun ano an rason han mao nga paghitaas han cases han mao nga sakit.
Nakatalaan gihapon nga magkaada hin meeting an DOH 8 ha Provincial Health Office ngan City health Council han Catbalogan agud nga mahisgutan kun patiunan-o mapupugngan an mas paghitaas pa han ihap han mga kaso han diarrhea.
