TACLOBAN CITY – Ginpahibaro han Tacloban City Police Office TCPO, nga nag-aandam na an ira han-ay para mag deploy han ira mga tinaglawas para ha pagtapo han Holy Week.
Sumala kan PMaj. Marjorie Manuta, Information Officer han Tacloban City Police Office ig dedeploy an mga kapulisan han siyudad ha upat nga calvary hills ha Tacloban, sugad hiton Calvary ha Siren District, Caibaan, Nula-Tula, ngan Tigbao Bypass road para bantayan an seguridad hiton mga inidbidwal nga masaka ha mga mao nga calvary hills.
Labot la ha mga Calvary Hills, magdedeploy gihapon hin mga kapulisan ha mga Simbahan, Airport, Bus Terminals, ngan ha mga dagko nga establisyemento tungod nga damo mangud iton mga tawo hine nga mga lugar. Magkakamayda gihapon mga road marshalls para bantayan ngan igsigurado nga safe iton mga nanbibiyahe.
Nagpahimatngun naman an opisyal ha molupyo nga karuyag nga sumaka ha mga Calvary Hills nga dapat siguradohon nga maybantay iton mga panimalay ugsa lumakat ngan nakatranka ine para malikayan an mga pangawat. Igcheck gihapon iton kondisyon han mga sarakyan nga gagamiton para malikayan iton mga aksidente, ngan dire pagdisplay ha publiko iton mga valuables ngan gindidire gihapon an pagdara han mga magtarom nga higamit.
