TACLOBAN CITY – Naghatag hin pagklaro an Tacloban City Police Office kasumpay han ginbuhat ng aksyon han nahitabo nga rally dida han nakalabay nga adlaw ha Justice Romualdez St., atbang han Price Mansion.
Sumala kan PLt. Col. Allan Camasin, Information Officer hiton Tacloban City Police Office, nagdurot hin paghuot han trapiko ngan pakadisturbo han mga mangaragi han karsada an nasabi nga aktibidad han mga raliyista.
Maabot manggud ha 80 nga mga indibidwal an nagdumara hin public assembly ha atubangn han Price Mansion pero waray an mga ine permiso ha pagdumara han nasabi nga rally.
Ha kahibaro han TCPO kasumpay han nasabi nga aktibidad in dayun an mga ine nga nagrespondi kun diin ha ginbuhat nga interbensyon han mga otoridad, ginsunod han mga kapulisan an prinsipyo han “maximum tolerance,” ngan ginpahibaro an mga partisipante han legal nga mga kinahanglanon para han sugad nga mga katitirok ngan ginhangyo nga lumakat hin mahimyang o igbalhin an ira demonstrasyon ngadto ha RTR Plaza, usa nga freedom park kun diin diri kinahanglan hin permiso.
Ha kaluyo han paningkamot han mga otoridad, an iba nga mga partisipante in nagin konprontasyonal, nagka-kawsa hin trapiko ngan nanguli-at ha mga kapulisan. Nagresulta ini han usa nga indibidwal nga gin-aresto tungod han pagtalapas han Article 151 (Disobedience to a Person in Authority or the Agents of such person) of the Revised Penal Code, pero dayon naman ine nga ginbuhian dida han kontrolado na an sitwasyon.
Kahuman han nasabi nga insidente, nagbuhat hin meeting an TCPO kaupod an mga organizer han nasabi nga aktibidad kun diin nagkasarabot an mga ine nga igbalhin an ira aktibidad ha RTR Plaza.
Gin baton ngan gin klaro gihapon han TCPO an mga nagsarang nga impormasyon ha social media kabahin han insidente kun diin waray nahipatik nga nasamaran o pag-pwersa durante han interbensyon han kapulisan.
