ODD NEWS- Usa nga kumpaniya ha Europe an nakaimbento hin usa nga kakaiba nga gadget agud nga gamiton pan -charge han mga cell phone an usa nga tanaman nga naka-display ha sulod han panimalay.
An mao nga gadget in tikang ha kompaniya han Arkyne Techonologies, nga gintatatwag nga Bioo Lite.
Ginbubug-os ini hin mga panel nga iginbubutang ha ilarom han surudlan o kun paso agud nga masalo hini an enerhiya nga nagtitikang ha photosynthesis han mao nga tanaman.
Nagpatapod naman an kompaniya nga akos hini nga makag-charge hin 1 nga cell phone hin 2 ngada 3 ka adlaw, ngan pwede nga bisan anu nga cell phone an ig charge ha Bioo Lite matungod nga compatible naman ini ha tanan.
Ginalalauman naman nga mag-iiha an mao nga gadget ha sulod han 5 ka tiug.
Mababaruan nga hapagkayana in diri pa ginbabaligya ha publiko an Bioo Lite pero plano han mao nga kompanya nga igawas ini ha presyo nga nagkakantidad hin $135 o kanbalyo han P6,000 dinhi Pilipinas.
