TACLOBAN CITY – Mayda na 9.66% nga civil works accomplishment an Department of Public Works and Highways (DPWH) Region 8 ha nagpapadayon nga paghingayad han Tacloban City causeway project nga an panuyo in makaghatag hin huruhalipot nga ruta ngan madagmit nga pagbyahe tikang ha gin iinayad nga bago nga Tacloban DZR Airport tipakadto naman ha downtown area han Syudad pinaagi han pagtabok han Cancabato Bay ha sulod han napulo (10) ka minutos.
Sumala kan DPWH-Eastern Visayas Director Engr. Edgar Tabacon nga labot han ira orihinal nga plano, in ira liwat iginpropose nga himuon nga tourist attraction ngan site an mao nga karsada pinaagi naman nga himuon nga aesthetic an iya landscape.
“We have plan for causeway na itong Cancabato Bay, of course addressing also some environmental concerns at ipasok natin dito sa causeway is gawin nating seem like Singapore yung kaniyang landscape.” yakan ni Tabacon.
Ginkakalakipan han mao nga proyekto an upat (4) ka road embankment nga mayda tulay butnga, bike lanes, concrete canals, sidewalks ngan pati gihapon wave deflectors.
Dugang pa ni Tabacon nga kun mahuman na an mga ginbubuhat nga mga paghingayad sugad han Tacloban DZR Airport ngan an ginpapagplanuhan nga International Convention Center ha Syudad in possible naman nga magdamo an mga katawhan nga mapakadto han causeway sanglit ira liwat bubutangan hin mga kaunan.
Positibo pa hi Tabacon nga maibubutang na an nabibilin nga P1.99Billion nga budget requirement nga igin alutaga naman para ha 2025 ngan 2026 kumo pagpatapod han Kongreso.
An mao gihapon nga proyekto in magcocomplement ha panibago nga terminal building han paluparan nga nakadesinyo naman para han mga international flights.
