TACLOBAN CITY – Nagin malinampuson an syahan nga adlaw han pag-aabri han klase kun diin nagtikang dayun han mga kamaestrahan han an pagtutdo han ira mga inandam nga leksyon.
Sumala kan Tacloban National Agricultural School Assistant Principal, Nilo De Paz, ha pagsulod han mga istudyante ha ira mga iskuylahan in naka-andam na an mga gagamiton han mga ine tikang ha classrooms ngada ha mga lingkuran.
Pagsulod han mga istudyante in gintikangan dayun an pagklase mahitungod nga ine an mandato ha mga magturutdo.
Samtang, gin iskedyul naman ha kulop an mga late enrollees, kun diin dire liwat dayun an mga ine nga makakasulod ha ira mga klase mahitungod nga mag-aagi anay an mga ine ha proseso nga kaparehas han gin agian han mga nagpaka-enroll na nga istudyante.
Kinahanglan nga mag-Brigada anay an mga kag-anak ugsa pasudlon ha klase an istudyante mahitungod nga dire daw ine magigin patas ha mga nauna ngan nagsunod ha iskedyul nga kabataan ngan kag-anak.
Gintagan-duon naman ni De Paz nga dire hira maghahatag hin special treatment ha bisan hin-o nga magpapa-enroll hin late ngan igpapatuman an kaparehas nga proseso nga gin agian han mga on-time nga nagpa-enroll.
