TACLOBAN CITY – Utro nga ginpapatuman han Public Employment Service Office han syudad han Tacloban an implementasyon han Special Program for the Employment of Students (SPES).
Sumala kan Maureen Pacencia, Assistant Manager hiton Public Employment Service Office Tacloban City, an nasabi nga programa in maiha na nga programa kun diin an mga nakakatagamtam hine in adton mga istudyante nga ada ha high school, senior high school, ngan college.
An mao nga programa in baga-baga hin summer job han mga istudyante kun diin gin ooffer ine agud nga magkamay-ada hin panarabahuan an mga istudyante pag abot hiton bakasyon.
Mayda naman 160 nga slots an aabrihan para han yana nga tuig nga pagtutungaon naman ha duha ka-batch.
Nakatalaan nga abrihan an online registration para han nasabi nga programa dida hiton Pebrero 14, Myerkules, tinikangan hiton alas-8 hiton aga kutob alas-5 hiton kulop.
Adi naman kwalipikasyon para han mao nga programa:
•dire maubos ha 15-anyos ngan dire maigbaw ha 30-anyos an edad,
•residente han Tacloban City
•istudyante nga ada ha high school, senior high school, o college (1st year ngada ha 3rd year),
•waray bagsak nga grado tikang ha presente nga semester,
•dire malahos ha P166,088 an combined income han kag-anak,
•maaram han basic computer skills,
•dire membro hin 4Ps o MCCT, ngan
•dire iskolar hin bisan anu nga programa
Ginpasabot gihapon han mao nga opisyal nga mag-aakomodar la hira hin 200 nga aplikante pinaagi han first come, first seved basis.
Dire gihapon an mga ine ma-akseptar hin mga walk-in nga aplikante.
Para han link in nagpasabot gihapon ine nga igpopost ine ha kaparehas nga adlaw han pag-abri han pan-apply.
