NATIONAL – Ginsigurado ni House Speaker Martin Romualdez nga klaro an direksyon han 2025 national budget nga ada ha P6.352-trillion nga may panuyo nga igpadayon an pag-uswag ngan pagkusog han ekonomiya nga matatagamtaman han ngatanan nga Pilipino.
Ginbuhat ni Speaker Romualdez an pahayag ha pagtikang han budget deliberation han Kamara.
Umatender ha pagdungon an economic team ni Presidente Ferdinand Marcos Jr nga hira Budget Secretary Amenah Pangandaman, Finance Secretary Ralph Recto, NEDA Secretary Arsenio Balisacan ngan Bangko Sentral ng Pilipinas Governor Eli Remolona nga naghatag han briefing ha mga membro han Kamara de Representantes.
Iginpahayag ni Romualdez nga an national outlay an pinaka-epektibo nga pamaagi agud masigurado nga an mga Pilipino labi na an mga kablas in makakaabat han benepisyo han economic-achievements.
Dugang pa hine, an paghahatag hin prayoridad ha mga programa nga makakabulig ha pag-uswag han kinabuhi han mga aada ha vulnerable sector.
Gin punto gihapon hine nga klaro an misyon ha pag-aram han 2025 budget kun diin kinahanglan daw igbalik han mga Pilipino an buwis nga nakolekta ngan siguraduhon nga an serbisyo han gobyerno in para ha ngatanan.
An 2025 national budget in nakakabit ha spending priorities han Marcos administration ha ilarom han Philippine Development Plan 2023-2028.
