TACLOBAN CITY– Maabot ha 376 nga mga pasaheros ngan 123 rolling cargoes an stranded ha pira nga mga pantalan han Southern Leyte, tungod han malain nga panahon nga dara ni Tropical Storm Basyang.
Una hine, gin-isa ha Signal No. 2 an bug-os nga Southern Leyte, kun diin dayon nga nagpatuman hin evacuation an local nga pangobyernuhan para hadton mga nag-uukoy ha ligid han dagat.
Sumala kan Southern Leyte, Gov. Damian Mercado, dire naman sugad kakusog an ira naabat nga hangin ngan uran sanglit dayon la liwat nga nanguli an mga ine ha ira panimalay.
Dugang pa hine, dayon gihapon hira nakagdumara hin clearing operation ha pira nga karsada nga may nakakabalaong nga mga sanga hiton kahoy.
Waray naman may nahipatik nga pagparong hiton kuryente, ha iya nasasakupan.
Ginsigurado naman hine nga andam an relief goods, para hadton mga mag-eevacuate ngan sugadman para hadton mga stranded nga pasaheros ha ira pantalan.
Naka-standby MDRRMO, sugadman an pira nga mga opisyal, inkaso nga manginahanglan hin bulig durot han bagyong Basyang.
Ha pagkayana, padayon an ira ginhihimo nga monitoring ha dalagan hiton maraot nga panahon.
