NATIONAL – Nananawagan hi Bicol Saro Partylist Representative Brian Raymund Yamsuan ha liderato han Philippine National Police (PNP) nga tikangan na an pagpapahaluag ha training ngan padayon nga edukasyon ha ira mga police personnel agud masigurado nga nakasunod hira ha reporma nga iginpapatuman han Department of Justice ha pagkuha han mga ebidensya ngan case build up ha mga kaso nga criminal.
Ginpahayag pa ni Yamsuan nga panuyo han DOJ ha pagtudlok han mga bag-o nga aludayday agud masigurado nga magin “winnable” an mga kaso kun maipasa na ha korte, makakab-ot la daw ine kun nasunod ha police operational procedures an mga kapulisan nga nagse-secure han crime scenes.
Mahitungod nga ginpahitas-an na han DOJ an ira standard, sakto la daw nga nakatutok an atensyon han PNP ha padayon nga edukasyon ngan training han kapulisan.
Gindayaw naman ni Yamsuan hi Justice Secretary Jesus Crispin Remulla ha pagduduso han mga reporma ha justice system han nasud.
Kompyansa gihapon ine nga an bag-o nga criminal investigation procedures han DOJ in malilikayan na an pagsasalawad hin harassment complaints ngan mga mahinay nga kaso ha korte.
