TACLOBAN CTY — Ada ha 1,183 nga pamilya ha Sinirangan Bisayas an nakatagamtam hin mga food packs ngan tag-P3,000 nga food credits tikang ha Walang Gutom Program han gobyerno.
Ine in mahitungod han haros usa kabulan nga redemption activities han Department of Social Welfare and Development (DSWD) ha magkaduru-dilain nga lugar ha SInirangan Bisayas tinikangan han Disyembre 23 kutob Enero 13.
Dida han nakalabay nga semana, nahipatik an pinakadako nga ihap han mga benepisyaryo han nasabi nga programa kun diin ada ha 985 an ihap han nakakarawat hin bulig tikang ha Lawaan, Dolores, ngan Maslog ha Eastern Samar; Jiabong ngan Sta. Margarita ha Samar; Palo, Babatngon, ngan Abuyog ha Leyte; Tacloban City; ngan Catbalogan City.
An Walang Gutom Program in usa ha mga flagship program han DSWD kun diin panuyuan hine nga mapahamubo an ihap han mga nakaka-eskperyensya han kagutuman ngan malnutrisyon ha bug-os nga nasud.
