NATIONAL – Ginamalatumat han Land Transportation Office nga sobra 6,000 motor vehicles an naurhi ha bug-os nga nasud ha sakob han 15 ka adlaw dida han Hunyo kasunod han padayon nga agresibo nga pagpapatuman han No Registration No Travel policy.
Ginpahayag ni LTO Chief Vigor Mendoza II ha usa nga pahayag nga an sagunson nga operasyon in kinahanglan nga magsirbe kumo pahimatngun ha mga pabaya nga mga motor vehicle owners ha ira mga obligasyon nga i-renew an pagpaparehistro han ira sarakyan.
Sumala ha LTO, may kabug-usan nga 6,064 nga motor vehicles an nadakop tikang Hunyo 1 kutob Hunyo 15. Ha nasabi mnga ihap 5,127 an mga motorsiklo samtang an iba in mga four-wheel vehicles.
Samtang, may kabug-usan naman nga 5,479 an natagan hin violation ticket samtang 981 an na-impound. Para ha mga four-wheel vehicles, 34 an pampasaheros nga jeepney samtang pito an pampasaheros nga bus.
An nasabi nga kampanya han LTO kontra ha mga dire rehistrado nga sarakyan in kaparte han road safety instruction han Department of Transportation.
