TACLOBAN CITY – Ginkakalipay han Traffic Operations Management Enforcement & Control Office (TOMECO) nga umabot sobra 60% an kabug-usan nga mga indibidwal an umatender ha gindumara nga Road Safety Seminar ha Tacloban City.
Sumala kan TOMECO Enforcement and Operations Division Chief, Isabelo Jobs Lagutan nga waray hira nag-expect nga nalahusan nira an ira target nga ihap han mga molupyo nga umatender ha mao nga seminar.
Dugang hini nga karuyag signgon la nga damo iton naruruyag nga mabaro pa ha mga balaud trapiko ngan katalwasan ha kakarsadahan nga kun diin, nakaghipatik hira nga damo iton umatender ha nasabi nga seminar tikang ha siyahan nga adlaw hini dida han Oktubre 14 kutob han kahuman hini dida han Oktubre 30.
Sumala pa kan Lagutan nga para ha mga waray makaatender han seminar in posible nga mapending an renewal han lisensiya han mga ini.
Magkakamayda naman utro hira hin seminar pero maiha pa ngan posible aada pa pagdudumaraon ha bulan hiton Marso o Abril mahitungod nga nakapokus na hira yana nga mga bulan ha pagproseso han mga ma-renew han lisensiya.
Samtang, dugang pa hini nga maaro gihapon hira hin kaangayan nga rason ha mga indibidwal nga waray maka-atender agud makita kun hin-o la an nakikisabay ngan hin-o an waray makaatender mahitungod ha personal nga rason sugad emergency.
Manunumduman nga gindumara an Road Safety Seminar para ha mga public utility vehicle (PUV) drivers ngan operators ha Tacloban New Transport Terminal agud ipasamwak an seguridad han mga pasaheros ngan an responsible nga pagma-maneho kumo rekisitos ha pagbag-o han mga business permits.
Ginaandaman naman yana han siyudad an maabot 3,000 nga PUV permit renewals ha masunod nga tuig 2025.
